ລົງຊຸກຍູ້ວຽກງານຄຸ້ມຄອງຊັບພະຍາກອນນ້ຳ ແລະ ອຸຕຸນິຍົມ ໃຫ້ບັນດາເມື່ອງ ທົ່ວແຂວງໄຊຍະບູລີ

ລົງຊຸກຍູ້ວຽກງານຄຸ້ມຄອງຊັບພະຍາກອນນ້ຳ ແລະ ອຸຕຸນິຍົມທີ່ເມືອງໄຊຍະບູລີ

ຕະຫຼອດເດືອນ ມິຖຸນາ 2019 ທາງຂະແໜງຊັບພະຍາກອນນ້ຳ ແລະ ອຸຕຸນິຍົມ, ພຊສ ແຂວງໄຊຍະບູລີ ແມ່ນຈະໄດ້ລົງຊຸກຍູ້ວຽກງານວິຊາສະເພາະໃຫ້ແກ່ບັນດາເມືອງ ທັງ 11 ເມືອງໃນທົ່ວແຂວງ ເພື່ອແນໃສ່ສ້າງຄວາມເຂົ້າໃຈ ແລະ ນຳເອົາບັນດານິຕິກຳຕ່າງໆທີ່ກ່ຽວກັບຂ້ອງໄປເຜີຍແຜ່ ໂດຍສະເພາະແມ່ນ ກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳ ສະບັບປັບປຸງ, ຍຸດທະສາດຄຸ້ມຄອງອ່າງຮັບນ້ຳ ແບບເຊື່ອມສານ 10 ປີ (2016-2025), ຂໍ້ຕົກລົງວ້າດວ້ຍການຄຸ້ມຄອງນ້ຳໃຕ້ດິນ, ພາລະບົດບາດແລະ ການແບ່ງຂັ້ນຄຸ້ມຄອງຕ່າງໆ ເພື່ອຮັບປະກັນໃຫ້ການຈັດຕັ້ງປະຕິບັດວຽກງານຄຸ້ມຄອງຊັບພະຍາກອນນ້ຳ ແລະ ອຸຕຸນິຍົມ ສາມາດບັນລຸໄດ້ຕາມຈຸດປະສົງ ແລະ ມີປະສິດທິພາບ.

ດັ່ງທີ່ເຮົາຮູ້ກັນແລ້ວວ່າ, ວຽກງານຄຸ້ມຄອງຊັບພະຍາກອນນ້ຳ ແລະ ອຸຕຸນິຍົມ ແມ່ນວຽກງານໜື່ງທີ່ມີຄວາມສຳຄັນ ເພາະມັນໄດ້ຕິດພັນກັບການດຳລົງຊີວິດຂອງພໍ່ແມ່ປະຊາຊົນ ແລະ ທຸກຊັ້ນຄົນໃນສັງຄົມ ລວມໄປເຖີງການພັດທະນາເສດຖະກິດ-ສັງຄົມ ໂດຍສະເພາະການນຳໃຊ້ນ້ຳເພື່ອການກະສິກຳ, ອຸດສາຫະກຳ, ພະລັງງານໄຟຟ້າ, ນ້ຳປະປາ, ການປະມົງ, ແລະ ອື່ນໆ. ໃນທາງກົງກັນຂ້າມ, ນ້ຳເປື້ອນແລະສີ່ງເສດເຫຼືອຈາກຂະບວນການຜະລິດ ໄດ້ຖືກປ່ອຍ ແລະຊະລ້າງ ລົງສູ່ແຫຼ່ງນ້ຳໂດຍປາສະຈາກການບຳບັດ ຊື່ງມັນໄດ້ສ້າງແຮງກົດດັນໃຫ້ກັບລະບົບນິເວດທາງນ້ຳ ເຊັ່ນ: ປູ,ປາ,ແລະ ສີ່ງມີຊີວິດອື່ນໆ. ນອກຈາກນັ້ນ ການປ່ຽນແປງຂອງສະພາບດິນຟ້າອາກາດ ກໍ່ນັບມື້ນັບຮຸນແຮງຂື້ນ ຊື່ງເຮັດໃຫ້ເກີດມີໄພນ້ຳຖ້ວມ,ໄພແຫ້ງແລ້ງ ມັນໄດ້ສ້າງຄວາມເສຍຫາຍທາງດ້ານຊີວິດ ແລະ ຊັບສິນຂອງພໍ່ແມ່ປະຊາຊົນຢ່າງຫຼວງຫຼາຍໃນແຕ່ລະປີ.

ລົງຊຸກຍູ້ວຽກງານຄຸ້ມຄອງຊັບພະຍາກອນນ້ຳ ແລະ ອຸຕຸນິຍົມທີ່ເມືອງບໍ່ແຕນ

ສະນັ້ນ, ວຽກງານສ້າງຄວາມອາດສາມາດ ແລະ ລົງຊຸກຍູ້ວຽກງານໃຫ້ແກ່ທ້ອງຖີ່ນໂດຍສະເພາະບັນດາເມືອງ ແມ່ນມີຄວາມສຳຄັນຫຼາຍ ເພາະຈະໄດ້ນຳເອົານະໂຍບາຍ, ແນວທາງ, ລະບຽບການ ນຳໄປຈັດຕັ້ງຜັນຂະຫຍາຍລົງສູ່ຮາກຖານ ແນ່ໃສ່ສ້າງຄວາມເຂົ້າໃຈ ແລະ ສ້າງຊຸມຊົນໃຫ້ເປັນເຈົ້າການໃນການປົກປັກຮັກສາສີ່ງແວດລ້ອມໂດຍສະເພາະການຄຸ້ມຄອງນ້ຳ ແລະ ຊັບພະຍາກອນນ້ຳໃຫ້ມີຄວາມຍືນຍົງ ສາມາດຕອບສະໜອງໃຫ້ແກ່ການພັດທະນາເສດຖະກິດ-ສັງຄົມ ໄດ້ທັງປະລິມານ ແລະ ຄຸນນະພາບ.

ຂຽນໂດຍ: ຄຳຫຼ້າ ອິນສຸນັນ